«Bu yıl iyül ayında körüştik, amma körüşüvlerge tek altı ayda bir kere izin berile», – dey Mayye Mustafayeva.
Onıñ aytqanına köre, sert tutuv şaraitlerinde aqayı taze avağa çıqıp olamay: «Konvoy yanında çıqa ve içeride buluna. Kameradan çıqmağa ruhset berilmey».
Server izolâtsiya rejiminde buluna, bu da onıñ sağlığına menfiy tesir ete ve derslerni devam ettirmege bermey.
Onıñ aytqanına köre, küneş nurları olmağanından D vitamininiñ eksikligi başladı. Bundan ğayrı, közleri bozula, tizlerindeki qıçıruvlar devam ete, bu ise qoşma teşkerüvni talap ete.
«Biz oña dal ayaq deformatsiyası sebebinden ortopedik ayaqqap berdik, çünki adiy ayaqqaplar oña kelişmey», – dedi apayı.
Oquv yasağı ise qıyın bir sınav oldı, dep qayd etti Mustafayeva.
«Oqumağa pek istedi, universitetke kirdi ve birinci kursını bile bitirdi, amma sert tutuv şaraitleri sebebinden onı atqanlar. Oquvına devam etmesi içün küreşemiz, amma şimdilik bu mesele çezilmedi», – dep qayd etti Mustafayevniñ ömür arqadaşı.
Server Mustafayev – «Qırım birdemligi» cemaat birleşmesiniñ koordinatorı. 2018 senesi tintüvlerden soñ uquq qoruyıcılar Server Mustafayev ve Edem Smailovnı apiske aldı.
2020 senesi sentâbrniñ 16-nda Rostov-na-Donudaki Cenübiy okrugınıñ arbiy mahkemesinde qırımlı aq qorçalayıcı 14 yılğa azatlıqtan marum etildi. Qabaatlar Bağçasaraydaki «Hizb ut-Tahrir davasına» ilâve etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.