Ukrayina 10 yıllıq cenkke azırlanmaq kerek, dep tüşüne Qırımlı rejissör ve arbiy hızmetçi Oleğ Sentsov. Bunı o, "Real" filminiñ premyerası vaqtında Azatlıq Radiosına bergen intervyüsında bildirdi.
"Başımıznı qumğa qapatmaqnı toqtatmaq kerekmiz. Başta eki afta, soñ eki ay, soñ eki yıl aqqında laflar edi. 10 yıllıq cenkke azırlanmaq kerek. Eger bizler 10 yılğa cenkke azır olsaq, ve o daa evel bitse, demek biz ğalebe qazandıq ve er şeyni doğru yapqanımız demektir", — dedi o.
Sentsovnıñ fikrine köre, memleket Rusiyege qarşı cenk qıyın, ciddiy ve uzun müddetli olğanını añlamaq kerek, şunıñ içün er kes iştirak etmeli.
"Erkeklerniñ episi hızmet etecek, demobilizatsiya yapmaq kerek, devri arbiy yolaqqa keçirmek ve mudafaa ve istisalğa para yatırmaq, yañı asfalt ya da stadionlar qurmaq degil. Bu er şey bekley bile", — dedi rejissör.
"Eger de biz er vaqıt onıñ (cenkiniñ - QA) yılnıñ soñuna qadar bitmek üzre olğanını tüşünsek, uzun müddetke planlaştırmaycaqmız. Biz daima bugünki künnen yaşaycaqmız, ve bu kün biz içün yahşı bitmey bile", — dedi arbiy.
Rusiye Federatsiyasınıñ tam miqyaslı istilâsınıñ ilk künlerinde Sentsov Kıyivniñ territorial mudafaasına kirdi, soñra Lugansk ve Donetsk vilâyetleriniñ eñ kergin yönelişlerinde cenkleşti. Ukrayina rejissörı, "Qırımğa ukrayin bayrağını qaytarmaq içün" cenkleşkenini ayta edi. Cebede Sentsov üç kere yaralanğan edi, şu cümleden kontüziyasını da alğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.