Rusiye apishanesinden azat etilgen ukrainalı rejissör, qırımlı Oleg Sentsov kerçekleştirilgen Ukraina-Rusiye deñişiminden soñ Qırımnıñ tez vaqıtta işğalden qurtarılacağına ve Donbastaki zıddiyet bitecegine inanmay.
Bu aqta o, avgustnıñ 10-nda Kyivdeki matbuat konferentsiyasında ayttı.
«Rusiye Avropa toplulığında qalmağa istey ve Ukrainada memuriyet (Ukraina prezidenti – QA) deñişti. Bular bir keldi, şu sebepten biz mındamız. Bu Rusiyeniñ Ukrainanı yiberip, Qırımnı, Donbasnı keri qaytarmağa ve istegeniñiz kibi yaşamağa bermege azır olğanını köstermey. Yoq, bu olmaycaq», – dep tüşüne Sentsov.
«Endi aytqan edim, yüz yıl devam etken muzakereler bir künlik cenkten daa yahşıdır. Amma Rusiye ile barışıqnı aytsaq, qaşqır qoy terisinde ne qadar saqlansa da, qaşqır olıp qalacaq», – dep qoştı o.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi.
Ukraina prezidenti Volodımır Zelenskıy ukrainalılarnı ava limanında qarşıladı. O, Qırım.Aqiqatqa izaat berip, Rusiyede apiste tutulğan qırımtatar faalleriniñ azat etilüvi Ukraina-Rusiye almaşuvınıñ ekinci basamağı olacaq.
2014 senesi mart ayında Rusiye Ukrainağa ait Qırım yarımadasını işğal etti. Bir qaç künden soñ Rusiye Baş istihbarat idaresiniñ polkovniki İgor Girkin (Strelkov) yolbaşçılığında Rusiye mahsus arbiyleri Slavânsknı zapt etken soñ Donbasta Ukraina ve Rusiye desteklegen Rusiye gibrid orduları arasında silâlı zıddiyet başlandı. Onıñ neticesinde, Birleşken Milletlerniñ 2018 senesiniñ soñunda bergen malümatqa köre, tahminen 13 biñ insan elâk oldı.