Rusiyede mahküm etilgen ukrainalı rejissör Oleg Sentsovnı Labıtnangi koloniyasında advokat Dmitriy Dinze ziyaret etti. Bu aqta iyünniñ 5-nde Dinze Qırım.Aqiqatqa tarif etti.
Onıñ aytqanına köre, Sentsov icat etmege devam ete, ekinci film üzerinde işke başladı.
«Yaqında roman yazdı, yolladı, tezden onı bastırmaq kerekler. Añlağanıma köre, tezden basılacaq ikâyeler de yazdı. Şimdi ekinci film üzerinde işke başlay», – dedi advokat.
Dinzeniñ bildirgenine köre, Oleg Sentsovnıñ alı bir qarar.
«Özüni yahşı is ete. Bugün keyfi yerinde edi. Sağlığı da yerinde, özüne keldi. Sağlığını şikâyet etmey», – dedi advokat.
Dinzeniñ qayd etkenine köre, ukrainalı rejissör koloniya memuriyeti ile qavğa etmey.
2011 senesi Oleg Sentsov «Gamer» filmini çıqardı. Bu ikâye kibersportçı karyerasını yapqan qırımlı genç aqqında tarif ete. «Nosorog» ekinci filmi üzerindeki işni Oleg bitirip olamadı – bu işni Euromaydan, soñra Qırımdaki adise-vaqialar ve apis cezası toqtattı.
Qırımlı rejissör Oleg Sentsov ve anarhist Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
Oleg Sentsov Rusiye şimalindeki Labıtnangi şeerinde apiste yata. Aleksandar Kolçenko ise Uraldaki Kopeysk şeeriniñ koloniyasında buluna.
Keçken sene Rusiye apishanelerinde tutulğan bütün ukrainalı siyasiy mabüslerni azat etmek talabı ile tutqan 145 künlik açlıqtan soñ Oleg Sentsov «aşamağa yazma şekilde razı oldı». O, bunı «zornen aşatuv telükesi bar olğanından mecburiy adım» dep adlandırdı. Amnesty International zornen aşatuv işkence ola, dep bildirdi. 2018 senesi oktâbrniñ 25-nde Sentsovğa Avropa parlamentiniñ «İfade serbestligi» içün Saharov mukâfatı berildi.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.