"Sarı şerit" areketiniñ faalleri ukrayin tirenüviniñ timsallerinen yañı fotoresimlerni derc etti, olarnıñ aytqanına köre, olar Aqmescit, Aqyar, Yalta, Kezlev ve Canköyde yerleştirilgen edi.
"Bu sefer ukrayin tirenüviniñ timsalleri Yaltadaki Taras Şevçenko abidesinde, Aluştanıñ üstündeki Demerci dağında ve 5 Qırım şeeriniñ yaşayış maallesinde peyda oldı. Olar, TOT-ta qarşılıq devam etkenine daa bir delil, yerli sakinler ise Ukrayinanı bekley", — dep yazdı faaller fotoresimlerniñ astına.
Areketniñ Telegram kanalında şunı da qoştılar ki, "Ukrayina halqı ögünde olğan çoq sayılı qıyınlıqlarğa baqmadan, muqavemet er kün arta".
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Semey, Balıqlava kibi kiçik şeerlerniñ sakinleri qoşula.
Areketniñ eñ belli aktsiyalarından biri - sarı şeritlerniñ asılması ve yarımadada «Qırım Ukrayinadır» yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.