«Sarı şerit» areketiniñ faalleri Baydar yaylasınıñ eñ yüksek noqtası – Aqyarğa yaqın İlyas Qayada Ukrayina bayrağını kötergenler, dep bildirdi. Fotoresim areketniñ Telegram kanalında noyabrniñ 18-nde derc etildi.
«İşğalniñ 10 yılından soñ bile ukrayinlerniñ teslim olmağanınıñ delilidir», – dep aytıla fotoresim altında.
Bundan ğayrı, «Sarı şerit» faalleri Rusiye işğal etken topraqlarda ukrayilerniñ vatandaş tirenüvine qoltutmaq içün aktsiya keçirilüvini ilân etken edi. Aktsiya Ukrayinada noyabrniñ 21-nde qayd etilgen İtibar ve azatlıq kününde keçirilecek.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Semey, Balıqlava kibi kiçik şeerlerniñ sakinleri qoşula.
Areketniñ eñ belli aktsiyalarından biri - sarı şeritlerniñ asılması ve yarımadada «Qırım Ukrayinadır» yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.