Rusiye ile muzakerelerde Ukraina eyyetiniñ azası, Ukraina halq deputatı Rustem Umerov Kyiv işğal etilgen Qırım meselesinde bir uzlaşuv tüşünmey, dep bildirdi. Bu aqta o, Facebook saifesinde haber etti.
«Ukraina tek 1991 senesinden olğan halqara seviyede tanılğan sıñırlarnı tanıy. Añlaşmada taraflarnıñ 15 yıl devamında Qırım ve Aqyarnen bağlı meselelerni Ukraina ve Rusiye Federatsiyası arasında eki taraflı muzakereler vastasınen çezmek ıntıluvını qayd etmek imkânı muzakere etile. Soñki 8 yılda Ukraina Qırım ve Donbasnı işğalden qurtaruv meselesi tek siyasiy-diplomatik yolnen al etilmeli, dep qayd etken edi. Biz bunıñ tarafdarı olıp qalamız. Amma Ukraina ve Rusiye Federatsiyası Qırım ve Aqyar meseleleri cenk yolunen çezmeycekler dep, bunı uquqiy ceetten qayd etmege isteymiz. Tek muzakereler», – dep bildirdi Umerov.
O, Rusiye eyyeti «Qırımnen bağlı laf etmege, Qırımnen bağlı bazı meselelerni çezmege azır sanki», dep bildirdi. Gumanitar meseleler ve siyasiy mabüsler aqqında aytıla.
Rustem Umerov Rusiye eyyetiniñ Qırımnen bağlı diplomatik, siyasiy muzakerelerge azır olğanını «müsbet bir işaret» dep saya, dep qayd etti.
Martnıñ 29-nda İstanbulda Rusiye ile keçirilgen muzakerelerde Ukraina eyyeti Rusiyege Moskva ve Kyivniñ işğal etilgen Qırımnen bağlı fikirleri 15 yılğa qayd etilecek bir añlaşma teklif etti.
Ukraina prezidentiniñ ofisi, Kyivniñ Kremlge cenk toqtatıluvı içün teklif etken Ukrainanıñ telükesizlik kefaletleri Rusiye işğal etilgen Qırımda ve Donetsk ve Lugansk vilâyetleriniñ işğal altındaki topraqlarında vaqtınca çalışmaycaq, dep bildirdi.
Martnıñ 30-nda Rusiye prezidentiniñ matbuat kâtibi Dmitriy Peskov Ukraina eyyetiniñ teklifini izaatlap, Kreml Qırımnı Rusiyeniñ bir parçası dep saya, dep bildirdi. Onıñ aytqanına köre, Rusiye Anayasası işğal altındaki yarımadanıñ statusınen bağlı er angi muzakerelerniñ keçirilüvini yasaqlay.
Qırımtatar halqınıñ lideri Mustafa Cemilev Ukraina ve Rusiye arasında añlaşmada Qırımnıñ işğal etilgen topraq olğanı mıtlaqa qayd etilmeli, dep bildirdi.
Qırımtatar Milliy Meclisiniñ reisi Refat Çubarov Moskva ve Kyivniñ işğal etilgen Qırımnen bağlı fikirleri 15 yılğa qayd etilecek bir añlaşma teklifini takbih etti.
Martnıñ 21-nde Ukraina prezidenti Volodımır Zelenskıy cenk bitken soñ ve telükesizlik kefaletleri alınğan soñ Rusiye prezidenti Vladimir Putinnen yapacaq muzakerelerinde Rusiye işğal etken Qırım ve işğal etilgen Donbas topraqları meselesini kötermege niyetlene, dep bildirdi.
Baş nazir muavini – Ukrainanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk Ukraina işğal etilgen Qırımnı bir vaqıt Rusiye dep tanımaycaq, dep bildirdi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.