Yuqarı Radanıñ 2024 senesi mudafaa masraflarını arttırması tek arbiylerge daa çoq qoltutmağa degil, memleketniñ mudafaa imkânlarını da quvetleştirmege imkân berecek, dep bildirdi Ukrayina mudafaa naziri Rustem Umerov.
«Bu paradan 274,6 milliard ğrıvnâ imayecilerimiz ve qorantalarına ketecek. Daa 76,2 milliar silâ ve tehnikağa sarf etilecek, bu da ordunıñ modernizatsiyasını temin etip, uruş imkânlarını arttıracaq. Müimi şu ki, başta Ukrayinada işlep çıqarılğan silâ alınacaq», – dep yazdı o, Facebookta.
Bugün Ukrayina Yuqarı Radası mudafaa masraflarını tahminen 500 milliard ğrıvnâğa arttıruv qanun leyhasını tasdıqladı.
İyülniñ başında ükümet ve cenk vaziyetinde kirişimni desteklev keneşiniñ vekilleri arasında toplaşuv olıp keçti. Ukrayina Maliye nazirligi matbuat hızmetiniñ malümatına köre, toplaşuv iştirakçileri devlet bücetini bergiler vastasınen toldurmaq aqqında ükümet tekliflerini, mudafaanı maliyetleştirmek içün kelirlerni 500 milliard ğrıvnâdan ziyade arttırmaqnıñ qoşma yollarını muzakere ettiler: bu paranıñ 60%-ı arbiylerniñ aylıqlarına, 40%-ı silâ, tehnika ve diger ağır masraflarğa ketecek.
İyülniñ 18-nde Ukrayina Nazirler Şurası «Bergi kodeksine deñişmeler kirsetüv aqqında» qanun leyhasını cedvelge aldı. Vesiqada arbiy bergi tarifini 5%-ke kötermek (şimdi 1,5%) ve üçünci gruppanıñ ayrı iş adamlarını 1% bergi tölemege mecbur etmek teklif etile. Sentâbrniñ 17-nde deputatlar bergilerniñ arttırılması aqqında qanun leyhasına birinci oquvda qoltuttılar. Ekinci oquv oktâbr ayında olmalı.
Yuqarı Radanıñ bücet komitetiniñ yolbaşçısı Roksolana Podlasa bergiler köterilmese, sentâbrniñ soñunda arbiylerniñ yardımsız qalması havfı bar, dep iddia ete edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.