Rusiye mahkemesi tarafından 13 yılğa üküm etilgen «Qırım musulmanları davasınıñ» mabüsi Rustem Seytmemetov yürek ağrısı şikâyetlerinen hastahanege alındı. Bu aqta «Qırım birdemligi» ömür arqadaşı Zeranıñ aytqanlarına esaslanıp bildirdi.
Al-azırda qırımlınıñ angi tibbiy müessisede bulunğanı belli degil.
Soy-soplarınıñ aytqanına köre, soñki sefer Seytmemetov oktâbrniñ 7-nde «Zonatelekom» apishage bağı vastasınen hastahanege çıqarılacağını haber etken edi.
«Sağlıq vaziyeti yahşı degil edi, qan basımı ve yürek ağrısı raatsızlay edi. Oktâbrniñ 7-nden başlap bugünge qadar angi hastahanege alınğanını ve angi diagnoznen olğanını bilmeyim. Koloniyağa muracaat ettik ve resmiy cevap bekleymiz», – dep tarif etti qırımlınıñ ömür arqadaşı.
Mayısta Rustem Seytmemetov yürek ameliyatı olğan edi.
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
«Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.