12 yılğa üküm etilgen "qırımlı musulmanlar" davasınıñ mabüsi Rustem Muratov Rusiye Federatsiyasınıñ Vladimir şeerindeki apishaneden Hohrâki qasabasındaki №8 tüzetüv koloniyasına (Udmurtiya Cumhuriyeti) etap etildi. Bu aqta "Qırım birdemligine" vaziyetni bilgen menba bildirdi.
Apishaneden etap bir ay evelsi başlap, Kirov, İjevsk ve Pugaçev şeerlerinden keçti. 2026 senesi yanvarniñ 15-nde erkek İK-8-ke ketirildi. Al-azırda siyasiy mabüs bu qalacaq yerimi ya da tranzit olamı bilmey.
Murasovnıñ sağlıq vaziyeti qasevetlendire. "Qırım birdemliginiñ" subetdeşi aytqanına köre, faalni baş ağrısı ve yüksek qan basımı raatsızlay.
"Şimdi Rustem Murasovnı baş ağrısı ve yüksek qan basımı raatsızlay, oña ilâclar yazıldı. Faqat, koloniyağa kelgen soñ belli olğanına köre, ekimler bergen ilâclarnıñ yarısı ğayıp oldı", – dep haber etti subetdeş.
Rustem Muratov – Aqyarnıñ Nahimov rayonından faal. Apiske alınmazdan evel o, mahkeme oturışuvlarına barıp, semetdeşlerine pek faal qoltutqan edi. 2021 senesi avgustnıñ 17-nde Qırımda kütleviy tintüvlerden soñ uquq qoruyıcılar onı daa dört qırımtatar musulmanını tuttı.
2023 senesi mayısta Rostov-na-Donu Cenübiy okrugınıñ arbiy mahkemesi onı "akimiyetni zorbalıqnen zapt etmege azırlanğanında" ve terror teşkilâtınıñ faaliyetinde iştirak etkeninde qabaatlap, 12 yılğa üküm etti. Birinci dört yılı apishanede keçecek. 2023 senesi noyabr ayında istinaf mahkemesi ükümni deñiştirmedi.
Hatırlatamız, "Hizb ut-Tahrir" islâm siyasiy firqası 2003 senesinden berli Rusiyede yasaqlandı, amma Ukrayinada ve çoqusı memlekette serbest faaliyet köstere. Aq qorçalayıcılar bu davalarnı Qırımda din ve vatandaş faalligi sebebinden taqip dep saya.
2021 senesi avgustnıñ 7-nde Qırımda Rusiye quvetçileri qırımtatarlarnıñ evlerinde birden beş tintüv keçirdi, bundan soñ faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında faal Zaur Abdullayev, Qırımnıñ Aqmescit rayonında Raif Fevziyev tutuldı.
"Qırım birdemligi" cemaat birleşmesi advokat Aleksey Ladinniñ malümatına atıf etip, yaqalanğan qırımtatarlar "terror teşkilâtınıñ teşkil etilmesinde ve iştirak etmesinde" şübeli sayıla, dep bildirdi.