Rusiye yasaqlanğan "Noman Çelebicihan qırımtatar batalyonında" iştirak etkeninde qabaatlağan qırımtatarı Rustem Gugurikniñ sağlıq vaziyeti fenalaşa, sağırlaşıp qala bile. Bu aqta Qırımtatar Resurs merkezi ömür arqadaşı Viktoriya Gugurikniñ malümatına esaslanıp bildire.
Viktoriyanıñ aytqanına köre, sağlıq vaziyeti kritik qala. Devam etken ağrısı ve irin aqqanı içün bir qulağı zornen eşite, diger qulağı da, ne yazıq ki, telüke altında – acele tibbiy yardım olmasa, Gugurik bütünley sağırlaşa bile. Ekimge muracaat etkenine baqmadan, Rustem kerçek bir tedaviylev alamadı, çünki semereli ilâclar keregi qadar berilmedi.
Bundan ğayrı, Gugurik qan basımı arta ve nefesi toqtamayıp darala, dep şikâyet ete. Haberge köre, oña qan basımı içün bir ilâc berilmey, tek "qan şingenleştirgen" ilâclar ketireler. Rustem tiş köprülerini özü çıqarmağa mecbur edi, aş aşaması pek zorlaştı.
Viktoriya Gugurik Qırımtatar resurs merkezine haber etkenine köre, küzde Rustemge yürekni teşkermek içün holter taqılğan edi, amma neticeleri ne oña, ne de tuvğanlarına berilmedi. Nefes tarlığınıñ sebebi belli degil, yaraycaq bir tedaviylev olmağa da imkân yoq. Büyük cenk başlamazdan evel Hersonda baqılğan edi, ilâc ala edi, amma işğalden soñ bütün tibbiy tedqiqler toqtatılğan edi.
2022 senesi oktâbr ayında Rusiyeniñ nezaretinde olğan Aqmescit şeeriniñ Kiyev rayon mahkemesi Rusiyede yasaq etilge «Noman Çelebicihan adına qırımtatar batalyonında» iştirak etüv qabaatı ile Herson vilâyetinden qırımtatar taksici Rustem Gugurikni 8,5 yıl sert apis cezasına mahküm etti.
«Gratı» ukrayın neşriniñ malümatına köre, martnıñ 27-nde aqşam Rustem Gugurik apayı ve 6 yaşındaki qızınen beraber Rusiye tarafından işğal etilgen Novoalekseyevka qasabasından Qırımğa yol alğan edi. Rusiye büyük istilâsını başlamazdan evel çoq balalı baba taksici olaraq çalışqan. Cenk başlağan soñ qorantasını Bağçasaraydaki soylaprını alıp ketmege tırışqan, amma bunı yapamağan. Araba rusiye yoqlav keçitene kelir eken yolcular pasportlarını teşkerüv içün bergenler. Bundan soñ Rusiye FSB hadimleri Gugurikni yaqalağan.
Martnıñ 31-nde Rusiyeniñ nezaretinde olğan Aqmescit şeeriniñ Kiyev rayon mahkemesi Rustem Gugurikni «Noman Çelebicihan adına qırımtatar batalyonında» iştirak etüv qabaatı ile eki buçuq ayğa tevqif etkeni belli oldı.
Qayd etmek kerek ki, Rusiye FSBsi «Noman Çelebicihan qırımtatar göñülli batalyonına» Gugurik tutulğan soñ terror teşkilâtları cedveline kirsetti.