Dekabrniñ 3-nde ve 4-ndu Londrada keçirilgen NATO sammitinde iştirakçiler «terrorizm esas duşman» olğanına razı olıp, «terrorizm» olaraq tasnif etilecek areketler meselesinde bir fikirge kelip olamadılar.

NATO baş kâtibi Jens Stoltenberg 2019 senesi dekabrniñ 3-nde Londradaki sammitte çıqışta bulunıp, kün tertibinde «terrorizm ile küreş, silâ üzerinde kontrol, Rusiye ile munasebetlerimiz, ve tarihta ilk sefer NATO liderlerinen Qıtay quvetleşkenini laf etecekmiz», dep qayd etti.

Jens Stoltenberg

Faqat sammit Şimaliy atlantik ittifaqnıñ 70-inci yılında keçirilgenine baqmadan, Jens Stoltenberg bazı NATO memleketleriniñ liderleri arasında çıqqan qavğalarnı ara-sıra yımşatmağa mecbur edi.

Macron, Türkiyeni tenqit ete

Frenkistan prezidenti Emmanuel Macronnıñ Türkiyege nisbeten aytqan iddiaları eñ çoq diqqat celp etti. Macron, Türkiyeniñ NATOda mesleat keçirmeyip, keçken ay Suriye şimalinde başlatqan tedbirleri diger memleketlerniñ telükesizlik menfaatlarına tesir ete, dep bildirdi.

Bu tenqit Türkiye prezidenti Recep Tayyip Erdoğannıñ Suriyede telükesiz alannı quruv planını muzakere etken prezident Donald Trumpnen de bağlı olması mümkün.

Ankara «terror» dep adlandırğan Suriyedeki kürt quvetlerine yapılğan türk ücümları ABD prezidenti Donald Trump Amerika ordusınıñ regiondan çıqqanı aqqında ilân etken soñ başlandı.

«Bağışlañız, amma terrorizm ne olğanını bilmeymiz. Türkiyege baqsam, bizim tarafımızda, «İslâm devletine» qarşı omuz-omuzğa cenkleşkenlerge qarşı cenkleşkenini körem. Ve bazı vaqıtları olar (Türkiye tarafı) «İslâm devletiniñ» arqasında turğan küçlernen işbirligi yapa», – dep bildirdi Emmanuel Macron.

Nazir Prıstayko Rusiyeniñ areketleri aqqında

Terrorizm nedir degen sualini Londrada Ukraina Tış işler naziri Vadım Prıstayko da berdi. O, NATO sammitinen parallel keçirilgen konferentsiyada çıqışta bulundı.

Vadım Prıstayko

Prıstayko, Frenkistan prezidentiniñ «NATOnıñ duşmanı Rusiye ya da Qıtay degil, terrorizm ola» beyanatını izaatlap, terrorizm ile küreş Rusiye tecavuzına qarşılıq ihtiyacına zıt kelmey.

«Terrorizm ve Rusiye arasında farq körmeyim. Terrorizm – küç qullanuv yolunen siyasiy maqsadlarğa irişmek içün yapılğan areketlerdir. O, ukrainalılarnı öldüre, Avropa Birliginde himik silâ qullana», – dedi Vadım Prıstayko.

Ukraina naziriniñ aytqanına köre, Rusiyeniñ Ukrainağa qarşı istilâsı – «eñ yüksek seviyede, devlet seviyesinde terrorizm ola».

Ukraina memurı, Ukrainanıñ da «qabaatı» bar, dep qayd etti. Çünki Ukraina Sovetler Birligi dağılğan soñ Şarqiy Avropanıñ diger memleketleri kibi Şimaliy atlantik ittifaqına ve Avropa Birligine kirmedi.

Amerikanıñ Sesinden alındı