Kıyiv şeer arbiy memuriyeti Rusiye raketa ücüminde beş kişi elâk oldı, dep bildirdi.
Şeer yolbaşçısı Vitaliy Kliçkonıñ bildirgenine köre, zarar körgenlerniñ sayısı 11 insanğa arttı, 8-i hastahanelerde buluna.
Kiyev şeeriniñ arbiy memuriyetinde Şevçenko rayonında "Ohmadit" bala hastahanesi zarar körgenini de tasdıqladılar, viraneler bar.
Umumen, Kıyev akimiyetiniñ malümatına köre, raketa parçalarınıñ tüşmesi Solomenskıy, Dnipro, Darnitsa, Svâatoşın, Desna, Şevçenko ve Ğolosiyevo rayonlarında qayd etildi.
Krıvıy Riğde Rusiye ücüminiñ neticesinde 10 insan elâk oldı, 30-dan ziyade yaralandı, dep bildirdi Dnipropetrovsk vilâyetiniñ arbiy memuriyetiniñ yolbaşçısı Serğiy Lısak.
"Bölgege ava ücümleri yapıldı. Krıvıy Riğde de müessise viranesi ve yanğın oldı. İlk malümatlarğa köre, 10 kişi elâk oldı, 30-dan ziyade yaralandı. Krıvoroj rayonında da yanıqlar bar. Malümat alına", — dep yazdı o telegram kanalında.
Onıñ malümatına köre, Dniproda da çoq qatlı binalar, müessise, STO zarar kördi, yaralandı.
Rusiye ordusı çeşit 40-tan ziyade raketa qullanıp, Ukrayinağa ücüm etti, dep bildirdi Ukrayina prezidenti Volodımır Zelenskıy. Onıñ malümatına köre, Rusiye ücümine Kıyiv, Dnipro, Krıvıy Riğ, Slavânsk, Kramatorsk oğradı.
Rusiye arbiyleri Ukrayina regionlarına çeşit silâlardan muntazam surette ücüm ete. Delillerge ve şaatlıqlarğa baqmadan, Moskva, tam bir istilâ başlağanından berli, vatandaşlarğa nisbeten yapılğan ücümni red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.