Kreml işğal etken yarımada ealisiniñ erkânını deñiştirmek içün faal areket etkeni içün Ukraina akimiyeti Qırımdaki demografik vaziyetni tahqiq etmeli, dep bildirdi Qırım aq qorçalayıcı gruppasınıñ reberi Olga Skripnik Qırım.Aqiqatqa.
«Rusiye Federatsiyasınıñ strategik vazifesi – ealiniñ erkânını deñiştirmektir. Em insanlarnı, em añlarını. Qayd ete bilgen yönelişlerimizden biri – askeriyleştirilgen ealiniñ avuştırıluvıdır. Laf arbiyler, quvet qurulışları aqqında kete. Bundan ğayrı, Rusiye onı öz toprağı olaraq sayğanı içün olar endi hızmet yolculığına degil, daimiy işke keteler, yani qorantalarını da yanlarına alalar. Laf bir FSB hadimi aqqında ketse, üç qat arttıra bilemiz, çünki apayı ve balasınen kele, meselâ», – dep qayd etti Skripnik.
Onıñ bildirgenine köre, Rusiyede Qırımğa köçüv propagandası ve açıq reklaması yapıla.
«Bu vaziyette müim meyil onıñ (Rusiyeniñ – muar.) Ukrainağa qoltutqan ealini bütünley yoq etmek ya da terk ettirmek ola», – dep qayd ete aq qorçalayıcı.
Qırım aq qorçalayıcı gruppasınıñ yolbaşçısı, arbiy cinayetler içün cezalar qanunı işğal altındaki Qırımda demografik vaziyetni tahqiq etmege ve qayd etmege yardım etmeli. O, ekinci oquvda qabul etilgen edi, amma yarım yıldan berli prezidentniñ imzasını alamay.
Ukraina aq qorçalayıcıları qanunnı imzalamağa talap ete, amma Prezident ofisi bunı ne olarğa, ne de Azatlıq Radiosınıñ jurnalistlerine tefsir etmey.
Ukraina prezidentiniñ Qırımdaki daimiy vekili Anton Korınevıç yapqan beyanatlarında, qanunğa köre, arbiy cinayetlerniñ katalogı yapılmalı, dep qayd etken edi. İnsanlıqqa qarşı cinayetler maddesi ise Ukraina Ceza kodeksinde de peyda olmalı.
«Halqara ceza ve gumanitar uquqı normalarınıñ qullanıluvına dair Ukrainanıñ bazı qanunlarına deñişme kirsetüv» №2689 qanun leyhası 2021 senesi mayısta parlamentte qabul etilgen edi – oña 248 halq deputatı, esasen «Sluğa narodu» firqasınıñ azaları qoltuttı. Qanun leyhasınıñ müellifi – iç işler naziri Denis Monastırskiy. 2021 senesi iyün ayında qanun leyhası prezidentke imzalaması içün berildi, amma alâ daa imzalanmadı ve tüzetilmesi içün qaytarılmadı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.