Ukrayin dronları Rusiye Federatsiyasınıñ bir qaç regionına, şu cümleden Perm ülkesi ve Rostov vilâyetine ücüm etti. Exilenova+ ve Supernova+ Ukrayin nezaret telegram kanalları bildirgenine köre, uçucısız uçaqlardan biri Perm şeerinde çoq qatlı binağa barıp urulğan. Derc etilgen fotoresimler ve videolarda evniñ üst qatlarında yanğın aqibetlerini körmek mümkün.
Supernova+ yazğanına köre, ücümniñ maqsadı daa evel Ukrayin uçucısız uçaqlarınıñ ücümlerine oğrağan "Lukoyl-Permnefteorgsintez" (PNOS) Perm neft işleme zavodı edi. Bu müessise Rusiyeniñ eñ büyük cermay zavodlarından biridir. Onıñ quveti yılda 13 million tonnadan ziyade cermaynı teşkil ete, mında çıqarılğan cermay mahsulatınıñ 50%-dan ziyadesi ise ihracatqa yollanıla.
Perm ülkesiniñ gubernatorı Dmitriy Mahonin bildirdi ki, bölgede 27 dron tüşürildi, çoq qatlı ev zararlandı. Onıñ malümatına köre, bir insan elâk oldı, daa dört kişi yaralandı.
Exilenova+ NASA FIRMS hızmetiniñ resimini derc ete, mında, telekanalnıñ malümatına köre, Taganrogda ava bazasında yanğın qayd etildi.
Çuvaşiya başı Oleg Nikolayev bildirdi ki, region üzerinde, ilk malümatqa köre, eki uçucısız uçaq yoq etildi, cep bağı qullesi zararlandı.
Rusiye Mudafaa nazirligi, gece Rusiye ava mudafaası RF-niñ 17 regionı ve işğal etilgen Qırım ve Azaq ve Qara deñizleri üzerinde 306 Ukrayin dronunı urıp tüşürdi, dep bildire. Uçaqlarnıñ qaçı urulıp tüşürilmegeni aqqında aytılmadı.