Rusiye kontrolindeki Qırım Yuqarı mahkemesi "Eski Qırım" mustaqil musulman din cemiyetine ekstremist materiallarnıñ tarqatıluvı aqqında maddesine istinaden 400 biñ rublelik para cezasını berdi. Bu aqta "Qırım birdemligi" advokat Nazim Şeyhmambetovğa atıf etip bildire.
"Nazim Şeyhmambetov qayd etti ki, temyiz mahkemesinde, birinci instantsiyada olğanı kibi, imayesi bu sene ilk yaz ayında operativ-qıdıruv tedbirlerinde qaba bozuvlar olğanını qayd etti", — dep aytıla haberde.
Rusiye kontrolindeki Qırımnıñ İslâm Terek rayon mahkemesi oraq ayınıñ 9-nda para cezasını berdi.
İlk yaz ayınıñ 5-nde Eski Qırımdaki "Zubeyr Cami" camisinde keçirilgen tintüvden soñ dava açıldı. Bir afta soñra cemiyet reisi İdris Yurdamov memuriy protokol tizilgeni aqqında haber aldı. Vesiqağa binaen, teşkerüv vaqtında camide Rusiye akimiyetiniñ fikirince "ekstremist" olğan malümat tapıldı.