Orta küzniñ 27-de halqara uçuşlar vastasınen Krasnodar ava limanına kelgen mekân qaydı Qırım olğan bütün şahıslar filtrasiyadan keçirildi. Adamlar bir qaç saat beklemege mecbur oldılar, çoqusı Qırımğa ketken aqşam avtobusları ve trenlerini qaçırdı. Bu aqta adı açılmamaq şartınen Qırım.Aqiqat ile Qırımdan aq qorçalayıcı paylaştı.
Onıñ aytqanına köre, bu tek sıñırcılar ve FSB hadimlerinen subetler degil de, evel Rusiye pasportı olğan vatandaşlarğa qullanılmağan tolu ölçüli filtratsiya ceryanı edi.
"Er bir Qırım sakini filtrasiyağa yollanıldı. Olarnı tek sorğuğa çekmediler; olarnıñ bütün malümatları, şu cümleden qoranta azalarınıñ malümatları da, diqqatnen yazıldı. Olar özleriniñ kerçek yaşağan yeri, çalışqan yeri, oquğan yeri, Ukrayinada evelden soy-sopları barmı-yoqmı, telefon nomerleri, içtimaiy ağlarda nasıl messencerler, olarnıñ cep telefonı aqqında malümat ve daa çoq sualler — bütün cevaplar havfsızlıq hızmetiniñ agentiniñ noutbugındaki malümat bazasına kirsetildi. Niayet, olardan poligraf testini keçmek içün razılıq blankını imzalamaqnı talap ettiler, eger berilgen malümatnı teşkerüvde er angi bir uyğunsızlıqlar peyda olsa", — dedi aq qoruyıcı.
Onıñ fikrince, böyleliknen, Rusiye havfsızlıq küçleri Qırım sakinlerine basımnı arttırmağa devam eteler, bu ise "olarnıñ episi, atta Rusiyege sadıq olğanları bile, Kreml rejimi içün Rusiye Federatsiyasınıñ tam aqlı vatandaşları sayılmağanını" köstere.
Krasnodar matbuatınıñ malümatına köre, evel Orta küzniñ 22 ve 25-nde mekân qaydı Qırım olğan yolcular da Krasnodar ava limanında añlatmasız qoşma filtrasiyağa yollanılğan ediler.