Saban ayınıñ 27-sine keçken gecesi Rusiye arbiyleri Rusiyeniñ dört yönelişinden ve işğal etilgen Qırımdaki Sarabuzdan 102 ücüm dronunen Ukrayinağa ücüm ettiler, olardan tahminen 60-ı "Şahed" edi, dep haber ete Ukrayina ava quvetleri.
"Saat 08:30-taki malümatqa köre, Ava mudafaa quvetleri memleketniñ şimalinde, cenübinde ve şarqında duşmannıñ 93 Şahed, Gerbera, İtalmas ve diger çeşit BPLA-larını urıp tüşürdiler ya da bastırdılar", — dep, qayd etile beyanatta.
Arbiylerniñ malümatına köre, sekiz yerge uçucısız uçaqlarnıñ uruluvı qayd etilgen, daa dört yerge urulıp tüşürilgen dronlarnıñ parçaları tüşken
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.