Donetsk vilâyetiniñ Drujkivka şeerinde Rusiye ücümleri neticesinde yedi insan elâk oldı, 15 yaralandı, dep bildirdi vilâyetniñ arbiy memuriyetiniñ yolbaşçısı Vadim Filaşkin.
"Rusiyeliler şeerge kasseta granatalarınen ateş açtılar — bazarğa urdılar, anda er saba insanlar toplaşa. Bu daa bir maqsatlı arbiy cinayet ve Rusiyeniñ "barışıq" aqqında lafları boş olğanını daa bir kere isbatlay. Ücüm qurbanlarınıñ soñki sayısı daa belgilenmedi", — dep yazdı Fılaşkin telegramda.
Bundan ğayrı, onıñ aytqanına köre, Rusiye arbiyleri Drujkivkağa eki ava bombasını atqanlar: ticaret alanı, üç çoq qatlı ev ve üç şahsiy ev zarar kördi.
Donetsk OVA-sınıñ yolbaşçısı, elâk olğanlar 43 yaşından 81 yaşına qadar, yaralanğanlar ise 50 yaşından 72 yaşına qadar olğanını qayd etti.
Filaşkin daa bir kere vatandaşlarnı Donbastan çıqmağa çağırdı.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.