Ukrainanıñ BM daimiy vekili Volodımır Yelçenko Rusiyeni Gaaga mahkemesinen tehdit etti. Bu aqta o, Twittet saifesinde yazdı.
«Bu közlerge bir baqıñız. Rusiye qanunsız tutqan ukrainalı esir deñizcilerniñ anası ve qızı», – dep yazdı Yelçenko. O, Qırım yalısında zapt etilgen ukrainalı askerlerniñ tuvğanları Natalya Mokrâk ve Olga Oprıskonıñ fotosüretlerinen informatsion risale qoştı.
Just look at these eyes. Mother and daughter of Ukrainian sailors illegally kept by Russia. The Hague Tribunal is waiting for you, russian guys. pic.twitter.com/ZEfQ3L7auy
— Volodymyr Yelchenko (@YelchenkoUN) 15 марта 2019 г.
«Rusiyeliler, sizni Gaaga mahkemesi bekley», – dep qayd etti Yelçenko.
Natalya Mokrâk – Ukraina Arbiy-deñiz quvetleriniñ leytenantı, «Berdânsk» küçük zırhlı topçı kateriniñ komandanı Roman Mokrâknıñ anası, Olga Oprısko – Ukraina Arbiy-deñiz quvetleriniñ üyken matrosı Andriy Oprıskonıñ qızı.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.