Rusiyeni desteklegen Qırımlı bloger, "Krımskiy Smerş" kanalınıñ tesisçisi Aleksandr Talipov, yarımadada Qırımdaki qavehanelerniñ saipleri içün mahsus "stop-yır" cedveli olmalı, dep tüşüne. Bu aqta o "Sputnik v Krımu" rusiye radiosınıñ yayınında bildirdi.
Blogerniñ fikrince, saipler "Rusiyeniñ duşmanları" kim olğanını bilmeli, ve olarnıñ türkülerini qoymamalı.
"Yañı kurort mevsiminde insanlar restoran ve barlarda ne diñlemek mümkün olğanını, ne diñlemek mümkün olmağanını, kim kimge qoltuta ve kimge qol tutmaycağını añlasın dep çalışacaqmız. Bularnıñ episi tertip etilmeli", — dedi Talipov.
Onıñ aytqanına köre, yerli Rusiye akimiyeti ögünde böyle cedvelni meydanğa ketirmek vazifesi tura.
"Menimce, bu tsenzura degil, iş adamlarınıñ problemleri olmasın dep, bu aqıllı bir yardımdır", — dep qoştı o.
Qırımlı bloger Aleksandr Talipov öz telegram kanalında Ukrayina tarafdarı olğan yerli sakinlerniñ şahsiy malümatlarını derc ete. Bu kibi yayınlardan soñ Qırımlılar tutula ve mesüliyetke çekile.
Ukrayina prokuraturası Talipovğa qarşı "Milliy zıddiyet ve nefret doğuruv" maddesine istinaden cinaiy dava açtı.
2023 senesi avgustnıñ soñunda Ukrayin prokuraturası Talipovnı kollaboratsionizmde şübheli olaraq tanıdı.