Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüsler Cemil Gafarov, Server Gaziyev, Enver Ömerov ve Asan Yanikovnıñ (Qırımdaki «Hizb ut-Tahrir davalarınıñ» mabüsleri) sağlıq vaziyeti fenalaşqanını bildire. Onıñ malümatına köre, Rostov vilâyetiniñ SİZOsında tutulğan Cemil Gafarov «dializ olmaq kerek ve hastahanege acele yatqızılmalı».
Ukraina ombudsmeni, Rostov vilâyetiniñ SİZOsında bulunğan Server Gaziyevniñ içekler ve tiş problemleri bar, dep bildire. O da acele hastahanege alınmalı.
Enver Ömerov ve Asan Yanikov Aqmescit SİZOsında bulunalar. Denisovanıñ malümatına köre, olarnıñ sağlıq vaziyeti acele cerrahi tedbirlerine muhtac.
«Ukraina vatandaşlarınıñ tolu tibbiy tedqiqi yapılsın ve kerekli tibbiy yardım kösterilsin dep, Rusiye insan aqları vekâletlisi Tatyana Moskalkovağa acele muracaat ettim», – dep yazdı Denisova Facebookta.
Rusiye ombudsmeni Denisovanıñ muracaatına daa cevap bermedi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.