Rostov-na-Donu şeeriniñ Cenübiy okrugınıñ arbiy mahkemesinde Qırımnıñ Canköy rayonından beş Qırımtatarınıñ ükmü tezleştirilgen rejimde ilân etildi. Rusiye prokurorı Pötr Karandaşev mahkemeden Qırımtatarlarğa, "Üçünci Canköy gruppası" dava mabüslerine 17 yıldan 21 yılğa qadar azatlıqtan marum etüv cezasını belgilemekni talap etti. Bu aqta "Qırım birdemligi" haber ete.
"Qırım musulmanları davası"nıñ mabüsleri Ali Mamutov, Enver Halilâyev, Nariman Ametov, Vohid Mustafayev ve Remzi Kürtnezirov 14 yıldan 20 yılğa qadar sert rejimli koloniyada uzun müddetke azatlıqtan marum etildi.
Qabaatlanğanlarnıñ tuvğanları, mahkeme esnasnı beklenilmegen tarzda keçirdi ve bir künde taraflarnıñ munaqaşalarından üküm çıqarılmasına keçti, dep iddia eteler. Sabıq imam Remzi Kürtnezerovnıñ qızı Emine İslâmovanıñ aytqanına köre, toplaşuvlar pek sıqıştırılğan rejiminde keçti.
«... Prokurornıñ munaqaşalarından soñ keldi ve mahkeme tek yarım saat devam etti, dep ayttı. Prokuror çıqışta bulunıp, müddetni talap etti. Yarın devam etecek, dep ayttılar. Bugün (Quralaynıñ 21-nde) munaqaşalar saba saat 10-da başlamaq kerek edi. Saat 14:00-te advokatqa yazdım, o, oturışuv devam etkenini ayttı. Onı evge qaytaracaqlarmı, dep soradım. Advokat dedi ki, bugün soñki sözni aytmasa, qaytacaq. Daa soñra o, onı, büyük ihtimal ile, qaldıracaqlar, çünki mahkemeciler bir sebepten acele ete ve üküm saat 19:00 ilân etilecek, dep yazdı", — aytıp berdi İslâmova.
Prokuror, sabıq imam Remzi Kürtnezirovnı, Rusiyede yasaq etilgen "Hizb ut-Tahrir" davası boyunca 21 yılğa azatlıqtan marum etmekni talap etti. Qırımlını partiya faaliyetini teşkil etüvde ve akimiyetni zorbalıqnen zapt etüvge azırlanuvda qabaatlaylar. Qabaatlav versiyasına köre, o, ilk dört yılnı apiste keçirecek, qalğan müddetini ise sert rejimli koloniyada.
Davanıñ diger Qırımtatar mabüsleri — Vohid Mustafayev, Nariman Ametov, Ali Mamutov ve Enver Halilâyev içün prokuratura 17 yıldan 18 yılğa qadar apis cezasını istedi. Olarnı "Hizb ut-Tahrir" faaliyetinde ve akimiyetni zapt etmek ıntıluvda qabaatlaylar.
İmam Remzi Kurtnezerov 20 yılğa, Nariman Ametov 15 yılğa, Enver Halilâyev 14,5 yılğa, Vohid Mustafayev ve Ali Mamutov 14 yılğa üküm etildi.
Oturışuvğa yetişip olamağan faallerden biri "Qırım birdemligi"ne aytqanı kibi, "Üçünci Canköy gruppası" davasında ükümni ilân etmek qararı soñki ande qabul etilgen. Neticede çoqusınıñ soy-sopu Rostov-na-Donuğa kelmege yetiştirmegen, diñleyicilerniñ bir qısmı ise üküm çıqarılğan soñ haber aldı.
Hatırlatamız, 2024 senesi Sabannıñ 5-nde saba Qırımnıñ Bağçasaray ve Canköy rayonlarında uquq qoruyıcılar 10 Qırımtatarınıñ evinde tintüv keçirdi. Tutulğanlar arasında yerli sakinler: Ali Mamutov, Enver Halilâyev, Canköylü qurucı Nariman Ametov, imam Vohid Mustafayev, sabıq imam Remzi Kürtnezirov ve faal Arsen Kaşka bar edi.