Rusiyeniñ paytahtı Moskvada ve memleketniñ daa bir qaç şeerinde iyünniñ 23-nde siyasiy repressiyalar ve sahte cinaiy davalarğa qarşı ve uquq qoruyıcı sistemasınıñ gumanizatsiyası içün aktsiyalar keçirile.
Azatlıq Radiosınıñ malümatına köre, Moskvadaki Saharov caddesindeki mitingni qayd olmağan Libertarian firqası ve Jurnalistlerniñ zenaat birlikleri teşkil ettiler.
Aktsiya iştirakçileri «Meduza» Rusiye neşiriniñ jurnalistleri İvan Golunov, apiske alınğan jurnalist Abdulmumin Gaciyev, Azat Miftahov ve diger siyasiy mabüslerniñ davalarına diqqat celp etecek ola. Vatandaş aqlarını bozuvnen bağlı diger meseleler de köterilecek – Moskvadaki mitingde Şiyes stantsiyasında çöplük poligonınıñ qurucılığı ile küreşken teşebbüs gruppasınıñ vekili çıqışta bulunacaq.
Vladivostok ve Habarovskta aktsiyalar endi keçirildi, onlarnen insan iştirak etti.
Peterburgda akimiyet aktsiyanıñ keçirilüvine izin bermedi, çünki şeerde maqşam mezunlarnıñ «Alıye parusa» bayramı bar eken.
Rusiyede iyünniñ 12-nde İvan Golunovğa qoltutuv aktsiyaları keçirildi. Yürüş neticesinde Moskvada 500-den ziyade insan tutuldı.
Golunov narkotiklerni satmağa tırışqanında qabaatlandı. O, iyünniñ 6-nda Moskvada tutulğan edi. Politsiya, jurnalistniñ yanında ve evinde narkotik maddeleri tapıldı, dep bildirgen edi. Golunov narkotik oña gizliden qoyuldı, dedi. Onıñ advokatları tutuluv vaqtında ve ondan soñ bir sıra hata olğanını qayd etti.
Bir sıra halqara teşkilâtlar, belli jurnalist ve medeniyet erbapları, siyasetçiler Golunovnı qorumağa ve davasını açıq bir şekilde tahqiq etmege çağırdı. Tahqiqat mahkemeden onı apiske almağa rica etken edi, amma mahkeme avgustnıñ 7-ne qadar ev apsini belgiledi.
Golunovğa qarşı cinaiy iş qapatılğanını iyünniñ 11-nde Rusiye iç işler naziri Vladimir Kolokoltsev bildirdi. Qarar «jurnalistniñ qabaatı isbatlanmağanı içün» qabul etildi.
İvan Golunov – Moskva ükümetindeki satın aluvlar, cenaze ve çöplük biznesi aqqında metinlerniñ müellifidir. Onıñ tahqiqatları sayesinde Moskva şeer yolbaşçılığınıñ çöplükni Rusiye regionlarına taşımaq planları belli oldı, onıñ maqaleleri milliard rublelik devlet satın aluvlarınıñ tenderlerini lâğu etmege imkân berdi.