Rusiyede akimiyetke kösterilgen sayğısızlıq qanunını bozğan ilk insan para cezasını aldı. Bu aqta «Agora» halqara aq qorçalayıcı gruppasınıñ reberi Pavel Çikov Telegram-kanalında bildirdi.
Novgorod vilâyetiniñ Malaya Vişera sakini Yuriy Kartıjev 30 biñ ruble para cezasına üküm etildi.
Advokatnıñ aytqanına köre, politsiya hadimleri martnıñ 31-nde Kartıjev içtimaiy ağdaki saifesinde Rusiye prezidenti Vladimir Putinge nisbeten aqaretlev sözlerini qaldırğanını qayd etti.
«Onı bu sene martnıñ 29-nda işke tüşürilgen «akimiyetke sayğısızlıq» maddesine istinaden mesüliyetke çekkenler. 30 biñden 100 biñ rublege qadar para cezası berilmesi mümkün», – dep yazdı advokat.
Mart soñundan itibaren Rusiyede internette yalan haberlerniñ tarqatılması ve akimiyet ve devlet timsallerini aqaretler içün mesüliyet qanunı çalışa.
Birinci qanun internette cemaat içün müim olğan malümatnıñ doğru haber şeklinde vatandaşlarnıñ ayatı ve sağlığı içün telükeli olğan yalan haberlerniñ tarqatılmasını yasaqlamaqta. «Yañlış» malümat paylaşqan vatandaşlarnı 100 biñ ruble, memurlarnı 200 biñ rublege qadar, şirketlerni ise yarım million rublege qadar para cezası bekley.
Akimiyetni ve devlet timsallerini aqaretlev içün vatandaşlar 100 biñ rublege qadar para cezasınen ya da 15 kün memuriy apis cezasınen cezalana. Tekrar bozuv olsa, para cezası 200 biñ rublege qadar arttırıla bile.
Prezidentniñ insan aqları şurası ve diger aq qorçalayıcı teşkilâtlar qanun leyhalarını lâğu etmege çağırğan edi.
Aq qorçalayıcılarnıñ fikirince, Rusiyeniñ yañı qanunı esasında qırımlılar Rusiye akimiyeti, Rusiye timsallerine sayğısız yanaşqanı ve ukrain kütleviy haber vastalarınıñ haberlerini paylaşqanı içün ceza ala bile.