2024 senesi avgust ayına qadar Rusiyede cenkke qarşı laflar içün ordunıñ «itibardan tüşürilüvine» dair maddege istinaden 10 biñden çoq protokol tizildi. Bu aqta mahkeme malümatlarını toplağan «Mediazona» neşiri haber ete.
Bu maddege istinaden ilk protokollar 2022 senesi martnıñ ilk künleri tizilip başlandı, 2022 senesi soñuna doğru olarnıñ sayısı 5614 oldı, 2023 senesiniñ soñunda ise – 8590. «Mediazona» qayd etkenine köre, on biñinci protokol 2024 senesi avgustnıñ ilk aftası mahkemege berildi.
Ordunıñ tekrar «itibardan tüşürilüvi» içün cinaiy mesüliyet olacaq. «OVD-İnfo» malümatına köre, bu maddege istinaden Rusiyede 194 insanğa qarşı davalar açıldı.
Rusiyede ve onıñ tarafından işğal etilgen topraqlarda quvetçiler Ukrayına tarafdarlarını taqip ete. Rusiye tarafdarı qırımlı bloger Aleksandr Talipov öz telegram kanalında Ukrayınağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ «areketini yaramaylaştırğanı» içün memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.