Rusiye Mudafaa nazirligi iyünniñ 14-ne keçer gecesi 80-den çorq dronnıñ kütleviy ücümi aqqında bildirdi. Dronlar Belgorod, Volgograd, Voronej, Kursk, Rostov vilâyeti ve işğal etilgen Qırımda qayd etildi.
Rusiye müessisesi uçucısızlar tüşürilgenini bildirdi, aynı vaqıtta Rusiye vilâyetleriniñ yerli akimiyetleri zararlar aqqında haber etti.
Rostov vilâyetiniñ valisi Vasiliy Golubevniñ malümatına köre, Morozovsk rayonında uçucısıznıñ ücümi neticesinde elektrik teminlevi bozuldı. Bir qaç mesken yer elektriksiz qaldı. Astra Rusiye neşiri qayd etkenine köre, Morozovskta arbiy uçaq alanı bar. Aprelniñ 5-nde de ücümge oğrağan edi – o vaqıt ştab yolbaşçısı, FSB ve OMON hadimleri yaralanğan, bir Rusiye arbiyi elâk olğan edi.
Vali Aleksandr Güsev haber etkenine köre, Voronej vilâyetinde uçucısızlar cermay bazasına ücüm etti, yaqarlıq rezervuarları zarar kördi. «Uçucısız parçaları tüşkeninden qullanılmağan cermay bazasınıñ rezervuarı biraz zarar kördi. Yanğın olmadı, yaralanğanlar ya da başqa bir zarar yoq», – dep yazdı o.
Uçucısızlarnıñ ücümine oğrağan diger Rusiye regionlarınıñ akimiyetleri aqibetler aqqında şimdilik bildirmedi.
Ukrayına Mudafaa nazirliginiñ malümatına köre, ücüm arqasında Kyiv tura. Ukrayına tarafı bu malümatnı şimdilik izaatlamadı.
Rusiyeniñ Ukrayınağa qarşı büyük istilâsı başlağan soñ Rusiye regionlarına muntazam sürette dronlar uça, belli zararlar ve qurbanlar ola. Rusiye Mudafaa nazirligi ücümler Ukrayına tarafından yapıla, dep israr ete. Çoqusı allarda Kyiv bu haberlerni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.