Rusiye Federatsiyasında mahküm etilgen "Hizb ut-Tahrir" davasınıñ Aqmescit gruppasınıñ figurantı Farhod Bazarovğa Ukrayinağa qarşı cenkte Rusiye ordusınıñ erkânında iştirak etmekni teklif ettiler, amma o, red etti. Bu aqta QIRIM.News saifesine onıñ qadını Fetime Yanikova bildirdi .
"Bilgeniniz kibi, Rusiye Federatsiyası Ceza kodeksiniñ 205.5 maddesine istinaden (terroristik teşkilâtnıñ teşkil etilmesi ve iştirak etmesi) mahküm etilgenlerge şartlı azatlıq berilmey, amnistiya berilmey. Böyle mabüslerni de cenkke yibermeyler, amma Farhodqa kelip, "SVO"-da iştirak etmekni teklif ettiler. Amma aqayım red etti", — dedi o.
Şimdi Bazarov Rusiye Federatsiyasınıñ Saratov vilâyetiniñ Balaşov şeerindeki apishanede etap etilmesini bekley, bu daa mayısnıñ 30-nda olacaq edi, lâkin ne yerge belli degil.
"Mesele şunda ki, bizim dört balamıznıñ episi menim soyadımnı taşıy. Farhod ve men vesiqalarnen evlenmedik, tek diniy nikâh oldı, pasportta imza yoq. Bunıñ içün körüşüv aqqım yoq. Büyük oğlumnıñ pasportını deñiştirdik, şimdi ise soyadı Bazarov. Ve Farhodnı oğlumnen vasiyetnamege köre ziyaret ete bilem", — dep qoştı o.
2023 senesi martnıñ 10-nda Rusiye Federatsiyasınıñ Cenübiy okrugınıñ arbiy mahkemesi Farhod Bazarovnı 15 yılğa apishanege yolladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.