Rusiye tarafından mahküm etilgen qırımlı Marlen Mustafayevni Rusiye vatandaşlığından marum ettiler. O, Krasnoyarsk vilâyetindeki 6-ncı tüzetüv koloniyasında tutula. Bu aqta Qırımtatar resurs merkeziniñ idarecisi Zarema Bariyeva Facebook saifesinde bildirdi.
"2025 senesi ilk yaz ayınıñ 11-nde mahsus bölükte oña Rusiye Federatsiyasınıñ vatandaşlığını toqtatmaq içün vesiqalar berilgenini bildirdiler, vesiqalar mahküm etilgen maddeler esasında edi", — dep ayttı o ve bunı tek ilk yaz ayınıñ 8-nde bilgenini qoştı.
Uquq qoruyıcınıñ malümatına köre, Mustafayev maneviy ve fizikiy basqığa oğratıla, milliy ve diniy sebeplerden aşalana ve yetersiz aş sebebinden onıñ sağlıq problemleri bar.
"Hususan, memuriyet onı rus tilini bilmesine baqmadan, onı diktant yazmağa mecbur etmege tırışa edi, ve red etüvi — bozuv ⁇ kibi qabul etile edi" — dep qayd etti Bariyeva.
Marlen Mustafayev – siyasiy mabüslerniñ mahkemelerine barğan ve qorantalarına yardım etken qırımtatar faali. Apiske alınmazdan evel o, maşina tamirinen oğraşqan edi.
Mustafayev 2022 senesi fevral ayında Rusiye tintüvlerinden soñ tutuldı. Qırımnıñ bir qaç rayonında Rusiye havfsızlıq küçleri dört insannı tuttı: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terroristik olaraq tanılğan, amma dünyanıñ bir çoq memleketinde milliy qanunlar seviyesinde sıñırlavsız faaliyet köstergen "Hizb ut-Tahrir" islâm siyasiy firqasında iştirak etmekte qabaatlandı.