17,5 yıl apis cezasına mahküm etilgen Qırımtatar Ernest Seytosmanov "Vladimirskiy tsentral" apishanesinden Angarstaki (İrkutsk vilâyeti, RF) 2-nci tüzetüv cezahanesine etap etildi. Bu aqta "Qırım birdemligi" dostlarınıñ malümatına ve onıñ mektübine atıf etip bildire.
Seytosmanovnıñ qayd etkenine köre, o, alâ daa mektüpler yazıp ve tuvğanlarına telefon etip olamay. Yaqalanmazdan evel 40 yaşındaki Ernest Seytosmanov işğal etilgen Qırımnıñ Qyar rayonında traktorcı olıp çalıştı. O, Qırım ve Rostov-na-Donu şeerlerinde dindaşlarınıñ mahkeme esnaslarına da qatnay edi, qorantalarına yardım ete edi, cemaat teşebbüslerinde iştirak ete edi.
Seytosmanovlarnıñ evinde bir qaç kere tintüv keçirildi. Kiçik aynıñ 9-nda Qırımtatarnı tutıp, SİZO-ğa yolladılar.2023 senesi quralayda Cenübiy okrugınıñ arbiy mahkemesi Ernest Seytosmanovnı 18 yılğa azatlıqtan marum etti. Erkekni İslâm siyasiy fırqası Hizb ut-Tahrirniñ faalleri ile alâqada qabaatlı tanıdılar.
2020 senesi aynı mahkeme onıñ doğmuş qardaşı Enver Seytosmanovnı 17 yıl sert rejimli koloniyada qalmasına üküm etti.