12 yıllıq apis cezasına mahküm etilgen Aqyarlı qırımtatar faali Zavur Abdullayevniñ sağlığı fenalaşqanı içün, o, tibbiy yardımğa muhtac. Bu aqta "Qırım birdemligine" onıñ apayı Emine Abdullayeva aqayınen uzun körüşüvden soñ bildirdi.
Şimdi Abdullayev Rusiyeniñ Vladimir vilâyetiniñ Vladimir merkezinde 2-nci apishanede tutula. Ekinci Aqyar "Hizb ut-Tahrir" davasınıñ 51 yaşındaki iştirakçisine II tip şeker hastalığı ve gipertoniya diagnozı qoyulğan.
Abdullayevniñ qadını Emine, aqayınıñ sağlıq vaziyeti, qısmen teşkerüvlerge baqmadan, fenalaşmağa devam ete, dep qayd etti, "hususan, tişleri ve körme qabiliyeti".
Emine Abdullayeva, Zavurnıñ apis müddeti ğayrıdan sayılğanını bildirdi. Onıñ aytqanına köre, o, ilk qış ayınıñ 16-na qadar apiste qalacaq, soñra onı tüzetüv koloniyasına etap etecekler. Amma tam olaraq qaysı bir kün belli degil.
Zavur Abdullayev yılda tek bir kere yollanma ala bile. Soñki sefer ailesi oña keçken sene boş ayda yollağan edi.
2021 senesi arnam ayınıñ 17-nde Aqmescit, Bağçasaray rayonlarında, Aqyarnıñ Balıqlava ve Nahimov rayonlarında qırımlı musulmanlarnıñ evlerinde tintüvler keçirildi. Rusiye uquq qoruyıcıları beş insannı tuttı: faaller Rustem Murasov ve Rustem Tairov, Cebbar Bekirov, faal Zavur Abdullayev ve Raif Fevziyevni.
Bağçasaray rayonınıñ Zalanköy (Holmovka) köyüniñ sakini Zavur Abdullayev terroristik teşkilâtnıñ faaliyetinde iştirak etkeninde ve akimiyetni küçnen zapt etmege azırlanğanında qabaatladılar. Onı 12 yılğa azatlıqtan marum etip, ilk 4 yılını apishanede ve azat etilgen soñ 1 yılınıñ sıñırlanmasına üküm etkenler. İstinaf mahkemesi ükmüni deñiştirmedi. Apiske alınmazdan evel Zavur Abdullayev mangalcı aşçı olıp çalıştı.