Rusiye tış işler naziri Sergey Lavrov, Kursk vilâyetinde Ukrayina ve Rusiye arbiy quvetleriniñ ücüminden soñ Ukrayina ve Rusiye arasında muzakerelerniñ olması imkânını red ete
"Prezident bu aqta açıq-aydın ayttı ki, Kursk vilâyetine ücümler başlağan soñ, ücüm degil de, Kursk vilâyetiniñ territoriyasına istilâdan soñ, muzakereler aqqında laf bile olamaz. Ve prezident pek müim bir şey ayttı, men buña diqqat ayırmaq isteyim, biz bu vaziyetke qıymet kesecekmiz", — dep bildire Rusiye kütleviy haber vastaları.
O, Rusiye ve Ukrayinanıñ energetik obyektlerine ücümlerniñ toqtatılması boyunca muzakerelerniñ azırlanuvı içün Qatarnıñ aracılığı ile keçirilgen açıq olmağan bağlar aqqında malümatnı da laf olaraq adlandırdı. Bu aqta daa evel Vaşington Post neşiri haber etti.
Rusiye kütleviy haber vastaları, blogerler ve akimiyet vekilleriniñ malümatına köre, Ukrayina ordusı avgustnıñ 6-nda Rusiyeniñ Kursk vilâyetine kirdi. O vaqıttan berli regionda uruşlar devam ete. Rusiye Federatsiyasınıñ Kursk, Bryansk ve Belgorod vilâyetleriniñ akimiyeti regionlarda kontrterroristik ameliyat rejimini tayin etti.
Avgustnıñ 13-nde TİN, Ukrayina Rusiye Federatsiyasınıñ Kursk vilâyetinde topraqlarnı zapt etmek istemey, ukrayinlerniñ ayatını qorumaq ve Rusiye darbelerinden qorunmaq istey, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.