Rusiyede soñki künde koronavirusnen hastalanğanlarnıñ sayısı 1036-ğa qadar arttı. Bu aqta operativ ştab bildire.
Martnıñ 27-nde saba 196 yañı koronavirus yuqunçı qayd etildi, olardan 157-si – Moskvada. İlk COVID-19 diagnozı Mordoviya ve Dağıstanda hastalanğanlarğa qoyuldı. Umumen koronavirus Rusiyeniñ 58 subyektinde qayd etildi, dep haber ete Azatlıq Radiosı.
Eñ çoq hasta Moskvada – 703. Bir künde bir koronavirus hastası can berdi. Rusiyede COVID-19 qurbanlarınıñ sayısı üç oldı.
Koronavirus qayd etilgen 45 rusiyeli tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.