Rusiye Federatsiyasında askerlikke çağırılacaqlar içün elektron celpnameler saytı test rejiminde çalışıp başladı, dep qayd etti «Habr» IT-blogunıñ qullanıcısı. Noyabr ayından başlap anda askerlik celpnameleri ve akimiyet organlarınıñ qararları, askerlikke başlamağanlarnıñ aqları sıñırlanğanına dair malümat olacaq.
Qanun 2023 senesi baarde Rusiye Federatsiyasınıñ Devlet duması tarafından qabul etildi.
Elektron celpnamelerni noyabrniñ 1-nde yollap başlaycaqlar. Rusiye Devlet hızmetlerinde saifeleri tasdıqlanğan qullanıcılar saytta askerliklerinen bağlı malümat ala bilecek. Celpname elektrog cedvelde qayd etilgeninden 7 kün keçken soñ berilgen olaraq sayılacaq. Rusiye vatandaşına haber etilmeli, lâkin arbiy komissarlıqlarnıñ, evel olğanı kibi, komissiyanıñ qararından haberi bar olğanına dair imza almaları kerekmey.
Bıltır yazda qanun çıqarıcılar arbiy hızmetke alınacaq vatandaşlarğa celpname cedvelde qayd etilgen soñ Rusiyeni terk etmege yasaq etti. Ukrayinağa qarşı büyük istilâ başlağan soñ qabul etilgen qanunlar askerlik yapmağanlarğa maşina aydamağa, naqliyat ve mal-mülkini qayd etmege, kredit almağa ve kiçik biznes qayd etmege yasaqlay.
Bundan ğayrı, Rusiyede askerlikke çağıruvnıñ maksimal yaşı 27 yaştan 30 yaşqa arttırıldı. Rusiye Federatsiyasınıñ Devlet Duması orduda hızmet müddetini bir yıldan eki yılğa qadar arttırmaq ğayesini daima açıq teklif ete. İyül ayında akimiyet soñki sekiz yıl içinde eñ çoq adam orduğa çağırılğanı aqqında haber etti.
Sayt Reyestrpovestok.rf elektron poçta adresi boyunca açıq. Onı Rusiyeniñ devlet hızmetleri portalınıñ RTLabs işlep çıqaruvcısı cedvelge ala ve idare ete, dep emin oldı «Azatlıq Radiosınıñ» mühbiri.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.