Rusiyede soñki künde 5849 yañı koronavirus hastası qayd etildi. Bir künde 60 insan COVID-19 hastalığından vefat etti. Qırğınlıq başlağanından berli eñ büyük raqam oldı. 677 insan bir künde tüzeldi. Bu aqta operativ ştab bildire, dep haber ete Azatlıq Radiosı.
Yañı hastalar sayısı kene arta. Bir kün evelsi qayd etilgen hastalarnıñ sayısı soñki dört künge baqqanda daa çoq oldı. Yañı hasta sayısına köre Rusiye dünyada ABDden soñ ekinci yerde buluna. Aman-aman üç biñ yañı hasta Moskvada qayd etildi.
Bugünki künde Rusiyede resmiy malümatqa köre 68 622 koronavirus hastası bar. 615 insan yuqunçtan vefat etti.
Dünyada hastalarnıñ sayısı üç millionğa yaqınlaşa. 190 biñ hasta vefat etti. Qayd etilgen COVID-19 hastalarınıñ sayısına köre ABD lider olıp qala. Anda aman-aman 890 biñ hasta qayd etildi. Qırğınlıq başlağanından berli 50 biñden çoq kişi can berdi.
Your browser doesn’t support HTML5
Koronavirus ABDde: COVID-19 vaqtınıñ ananeleri (video)
Avropada qayd etilgen koronavirus hastalarınıñ sayısına köre İspaniya lider ola. Anda hastalarnıñ sayısı 210 biñden çoqtır. 22 biñden çoq kişi vefat etti. Avropada eñ büyük ölüm sayısı İtaliyada qayd etile – 25 biñden çoq insan vefat etti, COVID-19 hastalığına oğrağanlarnıñ sayısı aman-aman 190 biñ oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.