Rusiyede sentâbr 7-sinde Rusiye esirliginden Kyivge qaytqan kimer ukrainlerge qarşı tahqiqat ötkerilmesi devam etmekte, dep ayttı sentâbr 10-unda "1+1" televizion kanalınıñ efirinde Ukraina Yuqarı Radasınıñ insan aqları vekâletlisi Lüdmila Denisova.
Hususan, laf Ukraina deñizcileri aqqında yürsetile edi.
"Şimdi alâ daa dava malümatınen tanışuv yapıla. Deñizcilerimiz tanıştı, advokatlar tanışmaqta. Deñiz Tribunalınıñ ükmüne binaen, 119-ıncı madde, 24 ukrain deñizcige qarşı tahqiqatnıñ toqtatmaqnı Rusiyeden talap etmey. Amma 124-ünci madde, gemi ve deñizcilerni deral azat etmege talap ete", - añlattı ombudsmen.
O daa qoştı ki, 10 azat etilgen ukrainge qarşı Rusiye prezidentiniñ mefası bar edi, daa 1 kişi ve 24 deñizci şahsiy mecburiyetke köre azat etildi.
Bundan evel Rusiyede daa 113 Ukraina vatandaşı tutula, olarnıñ 89-ı - qırımtatarlar, dep bildirile edi.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.