Rusiye mahkemesi tarafından apis cezasına mahküm etilgen "Qırım birdemligi" cemaat birleşmesiniñ koordinatorı Server Mustafayev uquq fakultetiniñ ğıyabiy bölüginde oquvını başlap olamay. Cezahanede oña internetke irişim ve keçken sene sentâbr ayında ailesiniñ ketirgen noutbuknı bermeyler. Bunı "Qırım birdemligi" cemaat birleşmesi haber ete.
"Server, yaqında sessiya başlaycağını, birinci kurs imtianlarını bermek kerek olğanını, amma oña alâ daa noutbuknı bermegenlerini ayttı", - dep aytıp berdi advokat Vladimir Biliyenko.
Ömür arqadaşı Mustafayeva Mayeniñ sözlerinek köre, aliy oquv yurtunda ğıyabiy bölükte oquv dört yıllıq uzaqtan kursnı köz ögünde tuta.
"Onı universitetke qabul ettiler, amma oquvı başlanmadı. Böyle etip nasıl oquycaq bilmeyim, çünki 3-4 aydan berli bunen küreşemiz", - dep añlattı o.
Advokatnıñ bildirgenine köre, Mustafayevni yürek ağrısı raatsızlap başlağan.
«Qırım birdemligi» cemaat teşebbüsiniñ koordinatorı Server Mustafayev ve qırımtatar, musulman Edem Smailov 2018 senesi mayısnıñ 21-nde Qırımda Rusiye quvetçileri tarafından tutulğan edi.
2020 senesi sentâbrniñ 16-sında Rostov-na-Donu şeerindeki Cenübiy arbiy bölge mahkemesi ekinci Bağçasaray "Hizb ut-Tahrir davası" boyunca qarar çıqarğan edi. Server Mustafayev 14 yıl sert apis cezasına mahküm etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.