Rusiye akimiyeti «Qırım Cumhuriyeti ve Aqyar şeerniñ içtimaiy-iqtisadiy inkişaf» federal maqsad programmasını 2025 senesine qadar uzattı. İşbu qararnı Rusiye ükümeti tasdıqladı, dep haber ete «RİA Novosti Krım».
Rusiye İqtisadiyat nazirliginiñ malümatına köre, programmanıñ maliye etilüvi 122 milliard rublege arttırıldı.
Rusiye baş nazir muavini Marat Husnullin bildirdi ki, federal maqsad programmasınıñ sermiyası yarımadanı suvnen teminlev, «Tavrida» yolundan Qırımnıñ cenübiy yalısına keçişlerniñ qurucılığı ve rekonstruktsiyası tedbirleriniñ azırlanmasına ve diger maqsadlarğa ketecek.
Rusiye iqtisadiy inkişaf naziriniñ muavini Sergey Nazarovnıñ aytqanına köre, federal maqsad programması uzatıluvınıñ sebeplerinden biri programmağa Qırımnı suvnen temin etüv planınıñ kirsetilüvi oldı.
Hatırlatamız, 2020 senesi Qırımda suv vaziyeti kritik oldı. Avgustnıñ soñundan suv berüv cedvelleri Aqmescitte, Aqmescit ve Bağçasaray rayonlarında kirsetilgen edi. Daa soñra Qarasuvbazar ve Qarasuvbazar rayonına ve qısmen Aluştağa tesir etti.
Rusiye akimiyeti yañı suv boruları, suv aluvlarınıñ qurucılığı ve quyularnıñ qazılmasına milliardlarnen ruble berdi.
BM Ukraina monitoring missiyası, halqara uquqqa köre, Rusiye Qırımnı suvnen temin etüvden tamamen mesüliyetli, dep israr ete.
Resmiy Kyiv, Şimaliy-Qırım kanalından yarımadağa suv berilüvi tek Qırım işğali bitken soñ yañıdan başlaycaqtır, dep bildire.
Rusiye ükümeti işğal etilgen Qırımnıñ federal maqsad programmasını 2014 senesi avgust ayında tasdıqlağan edi. 2016 senesi noyabr ayında beş yılğa planlaştırılğan masraflar 770 milliard rublege (tahminen 352 milliard ğrıvnâ – QA) arttırıldı.