İlk yaz ayınıñ 9-na keçken gecesi Rusiye ordusı Zaporijjâğa uçucısız uçaqnen urdı, 66 yaşında qadın yaralandı. Bu aqta Ukrayinanıñ fevqulâde vaziyetler devlet hızmeti haber etti.
Müessiseniñ malümatına köre, ücüm neticesinde mesken ev yanıp başlağan, yanğın artıq söndürilgen.
Zaporojjâ vilâyetiniñ arbiy memuriyetiniñ yolbaşçısı İvan Fedorov, keçken künu Rusiye arbiyleri 13 meskün yerge 474 darbe endirdi, şu cümleden Veselânka, Ğulâypole, Novodanilivka ve Çervone şeerlerine yedi ava darbesini endirdi, dep bildirdi.
Rusiye Mudafaa nazirligi beş region, işğal etilgen Qırım ve Qara deñiz üzerinde 31 ukrayin uçucısız uçağı urılıp tüşürilgenini bildirdi. Krasnodar ülkesiniñ gubernatorı Veniamin Kondratyev yazğanına köre, Soçide uçaqnıñ parçaları içinde aydavcısı olğan maşnağa urğan, uçaqnıñ aydavcısı elâk olğan. Umumen, ilk malümatqa köre, regionda altı şahsiy ev zarar körgen.
Rusiye arbiyleri Ukrayina regionlarına çeşit silâlardan muntazam sürette ücüm ete.
Rusiye yolbaşçılığı, Rusiye ordusınıñ büyük cenk vaqtında Ukrayina şeerleri ve köyleriniñ grajdan infraterkibine maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.