Rusiye Baş prokuraturası 2025 senesiniñ başından berli 62 çetel ve halqara teşkilâtnıñ faaliyetini istenilmegen dep tanıdı. Bunı Merkeziy saylav komissiyasında keçirilgen brifingde havfsızlıq qanunlarınıñ yerine ketirilmesini nezaret etüv idaresiniñ yolbaşçı muavini Aleksey Jafârov bildirdi.
Onıñ aytqanına köre, bu teşkilâtlar Rusiyedeki vaziyetni kerginleştirmege tırışa, saylav esnaslarına qarışa ve devlet siyasetini itibardan tüşüre. Olarnıñ arasında "Sıñırsız mühbirler" halqara uquq qoruyıcı teşkilâtı. Jafyârovnıñ aytqanına köre, onı cedvelge Rusiyege qarşı sistematik faaliyet içün ve memlekette söz serbestliginiñ bozuluvı aqqında klişeni tarqatqanı içün kirsetlenler.
Jafârov şunı da qayd etti ki, yılnıñ başından berli "istenilmegen teşkilâtlar"nıñ faaliyetinen bağlı 130-dan ziyade memuriy dava açıldı.
Rusiyede "istenilmegen teşkilâtlar"nıñ faaliyetinde iştirak etüv içün memuriy ve cinaiy mesüliyet belgilendi.
2024 senesiniñ soñunda Rusiyede tahminen 200 teşkilât "istenilmegen teşkilâtlar" olaraq qayd etilgen edi. Keçken sene ise 65 teşkilât.