Rusiye Yuqarı mahkemesi Rostov-na-Donu Cenübiy okrugınıñ arbiy mahkemesi tarafından 13 yılğa azatlıqtan marum etilgen "Qırım musulmanları davasınıñ" mabüsleri Servet Gaziyev, Alim Karimov, Seyran Murtaza ve Erfan Osmanovğa çıqarılğan ükümni deñiştirmedi.
Bu aqta "Qırım birdemligi" cemaat birleşmesine advokat Emil Kurbedinov bildirdi.
"Temyiz mahkemesinde on yıl devamında deñişmegen delillerimizni tafsilâtlıca añlattıq, lâkin Rusiye Yuqarı mahkemesi Cenübiy okrug arbiy mahkemesiniñ ve Arbiy istinaf mahkemesiniñ ükümlerini deñiştirmedi", — dep yaza "Suspilne".
Bu dava çerçivesinde apishanede ölümi sebebinden tek Cemil Gafarovnıñ ükmü lâğu etildi.
2019 senesi martnıñ 27-nde Qırımda FSB, Rusiye İç işler nazirligi ve Rosgvardiya hadimleri qırımtatar faalleriniñ, şu cümleden "Qırım birdemligi" cemaat birleşmesiniñ vekilleriniñ evlerinde tintüvler keçirdiler. 2019 senesi martnıñ 27 ve 28-nde Aqmescitniñ Rusiye rayon mahkemesi bütün tutulğanlarnı apiske aldı. Yazda bu dava boyunca yaqalanğanlarnıñ sayısı 25 insanğa arttı.
25 qırımtatar cemaat faali — Ruslan Suleymanov, Alim Karimov, Rustem Şeyhaliyev, Mecit Abdurahmanov, Yaşar Müedinov, Bilâl Adilov, Cemil Gafarov, Riza İzetov, İzet Abdullayev, Asan Yanikov, Şaban Ümerov, Tofik Abdülgaziyev, Seytveli Seytabdiyev, Rustem Seythalilov, Akim Bekirov, Farhod Bazarov, Servet Gaziyev, Seyran Murtaza, Erfan Osmanov, Osman Arifmetov, Remzi Bekirov, Eskender Suleymanov, Enver Ametov, Vlâden Abdulkadırov ve Raim Ayvazov — Rusiyede teroristik olaraq tanılğan, amma bir çoq memleketniñ qanunlarında sıñırlanmağan islâm siyasiy partiyası "Hizb ut-Tahrir" ile alâqası olğanında qabaatlanalar.
"Memorial" aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs olaraq tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.