Temyiz şikâyeti avgustnıñ 28-nde baqıldı. Oturışuv devamında Eldar Kantimirov, Lenur Halilov, Ruslan Mesutov ve Ruslan Nagayev qırımtatar tilinde çıqışta bulunmaq istegenleri aqqında muracaat ettiler ve terciman berilmesini rica ettiler. Mahkeme, dört siyasiy mabüs "Rusiyede yaşağanını, rus tilli mekteplerde ögrenilgenini ve rus tilini yeterli derecede bilgenini" qayd etip, bunı red etti.
Emil Kurbedinovnıñ qayd etkenine köre, birinci instantsiyada ve istinaf basamağında da siyasiy mabüslerge terciman berilmey edi.
"Öz çıqışımda aytqan edim ki, mahkeme olarnıñ rus tilini yahşı bilgenlerine inansa bile, ana tilinde laf etken insan bu aqqından marum qalmamalı. Birinci instantsiya mahkemesinde çıqışta bulunğanda, olarnı sözlerinden kesip, munaqaşalarda soñki sözni aytmağa bermegen ediler. Bu diskriminatsiya degilmi? <...> Mahkeme sözüni toqtatmayıp bile edi, ükümde bu insanlar qırımtatar tilinde çıqışta bulundı, dep yaza bile edi, ve mahkeme olarnı añlamadı. Farqlı yollarnen areket etmek mümkün edi, amma insannı bir de bir aqqından marum etüv şekli olmasın", — dedi Kurbedinov.
Bundan da ğayrı, imayeci ve zenaatdaşları Edem Semedlâyev ve Siyar Paniç, kerçekten de bozuvlar çoq olğanını qayd eteler. Meselâ, imayecilerniñ fikrince, gizli şaatlarnıñ şahsiyetleri qanunsız şekilde gizlengen edi, ekspertizalar ise qanunnı bozıp alınğan edi.
Rusiye mahkemesi imayeniñ iç bir delilini qanaatlendirmedi ve ükümni amelde qaldırdı, em de istinaf mahkemesiniñ qararına şikâyetlerni red etti.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen «Hizb ut-Tahrir» islâm siyasiy firqasınen alâqaları bar dep qabaatladı.
2021 senesi avgustnıñ 16-nda Cenübiy okrugınıñ arbiy mahkemesi «Aluştadaki Hizb ut-Tahrir gruppasınıñ» mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.