Qırımda qırımtatarlarnıñ sürgünligi müzeyi olmalı. Bunı, Qarasuvbazar (Belogorsk) cemiyetinen icadiy körüşüvde belli Özbekistan ve Rusiye nesircisi Timur Pulatov ayttı, dep bildire Qırım.Aqiqat.
Öz Qarasuvbazar ziyaretini o, qırımtatar şairi ve alimi Bekir Çoban-zade eykeline çiçek qoymaqnen başladı, soñ ise yerli ülkeşınaslıq müzeyine qarasuvlılarnen icadiy körüşüvge ketti.
Timur Pulatov Qarasuvbazarda Bekir Çoban-zadeniñ eykeli yanında
"Qırımda sürgünlik müzeyi olmalı. Faaler, bu meseleni cemiyette yayratmalı. Bunı mediada aytmaq. Bellesem, adım-adım bu ğayeni kerçekleştirmek mümkün. Nesiller, sürgünlikni bilip, onıñ deşetlerini unutmamalı", - dedi körüşüvde Pulatov.
Qırımtatar faali Eskender İlyasov, qırımatatar milliy areketiniñ veteranı Nuriye Biyazovanıñ "Akis" ("Otrajeniye") qırımtatar halqının sürgünligi aqqında kitabını taqdim etti.
Qarasuvbazar musulman cemiyetiniñ reisi Talât İlyasov, musafirge meşur qırımtatar ressamı Ramiz Netovkinniñ resminiñ kopiyasını bağısaladı.
Yazıcı, Qarasuvbazarnı sentâbr 20-sinde iş seferi çerçivesinde ziyaret etti. Bundan evel o, Aqmescitte birinci qırımtatar kitap yarmalığında iştirak etti.