Rusiye arbiyleri iyulniñ 28-ne keçer gecesi Ukrayinağa 331 ava ücüm vastasınen ücüm etti: 324 uçucısız, dört X-101 qanatlı raketası ve üç X-47 M2 «Kinjal» aeroballistik raketasınen, dep bildirdi Ukrayina Silâlı quvetleriniñ Ava küçleri.
Darbeniñ esas yönelişi Hmelnıtskıy vilâyetindeki Starokostântıniv oldı, dep haber ete arbiyler. Bu şeer yanında arbiy uçaq alanı bar.
«İlk malümatqa köre, saat 9:30-ğa qadar ava mudafaa quvetleri, radioelektron küreş vastaları duşmannıñ 311 ava ücüm vastasını urdı/bastırdı: 309 darbe uçucısızı; eki X-101 qanatlı raketası», – dep aytıla haberde.
Ava quvetleri eki raketanıñ ve 15 darbe uçucısızınıñ üç yerde tüşkenini qayd etti, bir qaç yerde parçaları da tüşti. X-47 M2 aeroballistik raketaları nişanlarına yetmedi, dep qayd etti arbiyler.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye yolbaşçılığı, Rusiye ordusı Ukrayinanıñ şeer ve köyleriniñ grajdan infrastrukturasına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.