Rusiye arbiyleri mayısnıñ 12-ne keçer gecesi Ukrayinağa 108 uçucısıznen ücüm etti. Bu aqta Ukrayina Ava quvetleri bildirdi. Darbeler Odesa, Mıkolayıv, Jıtomır ve Donetsk vilâyetlerine endirildi.
Odesa vilâyetinde uçucısız ücümi neticesinde bir insan yaralandı. Belgorod-Dnestrovskiy şeerine ücüm etildi: mesken evler, memuriy bina ve yanğın söndürici stantsiyası zarar kördi. Ukrayina demir yolları Donetsk vilâyetinde yük trenine ücüm etilgenini, aydavcı yaralanğanını bildirdi.
Böylece, Rusiye AB memleketleri ve ABD qoltutqan Ukrayinanıñ mayısnıñ 12-nden başlap 30 künlik ateşkes teklifine qulaq asmadı.
Ukrayina uzun müddetli barışıqnı muzakerelerniñ şartı olaraq tanıtqan edi. Rusiye prezidenti Vladimir Putin mayısnıñ 15-nde İstanbulda ateşni toqtatmayıp muzakere keçirmege teklif etti. Ukrayina prezidenti Volodımır Zelenskıy Türkiyege barıp, Putinnen şahsen körüşmege istey, lâkin Putin böyle planları olğanını aytmadı. Zelenskıynıñ aytqanlarından añlaşıla ki, ateş toqtatılmasa bile, o, Türkiyege baracaq. Axios neşiri menbalarına esaslanıp, aynısını bildirdi.
Mayısnıñ 11-nde ABD prezidenti Donald Trump Ukrayinanı Rusiye prezidenti Vladimir Putinniñ teklif etken Türkiyedeki muzakerelerge «acele» razı olmağa çağırdı ve «Ukrayina Putinnen añlaşma tizeceginden» şübhelengenini bildirdi.
Rusiye prezidenti Vladimir Putin Ulu Vatan cenkinde ğalebeniñ 80 yılı munasebetinen üç künlik barışıq ilân etti. Putin barışıq vaqtında Rusiye bütün uruş areketlerini toqtatır, dep ayttı, amma olmadı. Ukrayina Silâlı quvetleri Ava küçleriniñ komandanlığı bildirgenine köre, üç kün devamında kütleviy dron ücümleri yapılmadı. Mayısnıñ 11-ne keçer gecesi, üç künlik barışıq bitken soñ, Rusiye Ukrayinağa 100-den çoq dron attı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.