Rusiye arbiyleri oktâbrniñ 21-ne keçer gecesi Ukrayinağa eki İskander-M/KN-23 ballistik raketası, dört S-300 zenit raketası, tahminen 70-i "Şahed" olğan 98 darbe uçucısızınen ücüm etti, dep bildirdi Ukrayina Silâlı quvetleriniñ Ava küçleri.
Ukrayina arbiyleri haber etkenine köre, dronlar Rusiyede üç yönelişten, işğal etilgen Qırımda Çavda burnu ve Sarabuz qasabasından uçurıldı.
“İlk malümatqa köre, saat 08:30-ğa qadar, ava mudafaası memleketniñ şimali, cenübi ve şarqında 58 duşman Shahed uçucısızını, “Gerber” ve diger dronlarnı tüşürdi/bastırdı”, – dep aytıla haberde.
Ukrayina arbiyleriniñ malümatına köre, 10 yerde raketalarnıñ ve 38 darbe uçucısızınıñ ücüm etkeni qayd etildi, eki yerde parçalar tüşti.
Rusiye arbiyleri Ukrayina regionlarına çeşit silâlardan muntazam sürette ücüm ete.
Rusiye yolbaşçılığı, Rusiye ordusınıñ büyük cenk vaqtında Ukrayina şeerleri ve köyleriniñ grajdan infraterkibine maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.