Ukrayina Ava quvetleriniñ malümatına köre, Rusiye Ukrayinağa qarşı uçucısızlarnı, qanatlı ve ballistik raketalarnı qullandı.
Volın vilâyetiniñ Lutsk şeerine qarşı ücüm sebebinden bir insan elâk oldı, çoq qatlı ev ve infrastruktura obyekti zarar kördi, dep bildirdi şeer yolbaşçısı İgor Polişçuk.
Poltava vilâyetine qarşı darbeler neticesinde beş kişi yaralandı: darbe sanayı obyektine keldi, dep haber etti region yolbaşçısı Filipp Pronin. Vilâyette üç patlav oldı.
Vinnıtsâ vilâyetinde eñ az dört patlav oldı, ekişer patlav Dnipropetrovsk, Zaporijjâ, Kyiv, Lviv ve Hmelnıtskıy vilâyetlerinde ve Kyivde oldı. Daa yedi regiondan darbe aqqında haber etile. Al-azırda yaralanğanlar aqqında malümat yoq.
«2Rusiyelilerniñ energetikamıznı yoq etmek arzusı olarğa, infrastrukturalarına paalı çıqacaq», – dep yazdı Ukrayina prezidentiniñ ofis yolbaşçısı Andriy Yermak. Kütleviy darbe sebebinden «Ukrenergo» elektriklerni acele söndürdi. Bir qaç regionda suv berilüvinde de problemler bar.
Rusiye arbiyleri Ukrayina regionlarına çeşit silâlardan muntazam surette ücüm ete. Delil ve şaatlıqlarğa baqmadan, Moskva, tam bir istilâ başlağanından berli, vatandaşlarğa nisbeten yapılğan ücümlerni red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayeti olaraq tasnif etip, belli maqsadları bar, dep qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.