Rusiye arbiyleri yanvarniñ 9-na keçer gecesi (yanvarniñ 8-nden saat 19:30-dan başlap) darbe uçucısızları, deñiz ve qara raketalarını qullanıp, Ukrayinanıñ kritik infrastruktura obyektlerine qarşı kütleviy darbe endirdi, dep bildirdi Ukrayina Silâlı quvetleriniñ Ava küçleri. Darbeniñ esas yönelişi – Kyiv ve Kyiv vilâyeti.
"Ava Küçleriniñ radiotehnik orduları umumen 278 ava ücüm vastasını – 36 raketa ve 242 çeşit uçucısıznı tapıp taqip etti", – dep aytıla haberde.
242 darbe uçucısızından tahminen 150-si "şahedler" edi. Darbe dronları yedi yerden uçurıldı – beşi Rusiyede, biri işğal etilgen Donetskte ve Rusiye işğal etken Qırımnıñ Çavda burnunda ve Sarabuz qasabasında. Qara deñizden 22 "Kalibr" qanatlı raketası uçurıldı.
"İlk malümatqa köre, saat 09:00-ğa qadar ava mudafaası 244 ava nişanını urdı/bastırdı: 226 duşman Shahed uçucısızı, "Gerber" (diger uçucısızlar); 8 "İskander-M"/S-400; 10 "Kalibr" qanatlı raketası. 19 yerde 18 raketa ve 16 darbe uçucısızınıñ ücümi qayd etildi", – dep qoştı Ukrayina Silâlı quvetleriniñ Ava küçleri.
Avadan ücüm aviatsiya, zenit raketa ordusı, radioelektron küreş bölükleri ve uçucısız sistemalar, mobil ateş gruppaları tarafından keri qaytarıldı.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.