Ukrayina prezidenti Volodımır Zelenskıy ve Ukrayina Silâlı quvetleriniñ baş komandanı Oleksandr Sırskıy avgustnıñ 12-nde Rusiyeniñ Kursk vilâyetinde ücüm operatsiyası keçirilgenini ilk sefer tasdıqladılar.
Devlet yolbaşçısı bu aqta Aliy komandanlıq toplaşuvında aytıldı, dep yazdı. Bundan ğayrı, Zelenskıynıñ Telegram kanalında Sırskıynıñ çıqışınen video aydınlatıldı.
«Kursk vilâyetinde ücüm operatsiyasınıñ keçirilüvi devam ete. Al-azırda Rusiye Federatsiyasınıñ tahminen biñ metr kâresi kontrolimiz altında buluna. Ordu berilgen vazifelerni yerine ketire. Vaziyet kontrol altında qala», – dep ayttı Ukrayina prezidenti.
O, «bütün askerlerge ve komandanlarğa sebatı ve qararlı areketleri» içün teşekkürler bildirdi.
«İç işler naziri, diger memurlar, Ukrayina telükesizlik hızmetine operatsiya keçirilece yerler içün gumanitar plannı azırlamağa emir etildi», – dep yazdı siyasetçi.
Kursk vilâyetiniñ vali vazifelerini eda etken Aleksey Smirnov Rusiye prezidenti Vladimir Putinnen toplaşuvda Ukrayina Silâlı quvetleri regionnıñ 28 mesken yerini kontrol ete, dep bildirdi.
Bundan evel Putin Rusiye Mudafaa nazirliginden «duşmannı Rusiyeden çıqarmağa» ve «devlet sıñırınıñ qorunmasını temin etmege» talap etti. Onıñ qayd etkenine köre, Rusiyeniñ sıñırdaki rayonlarında Ukrayina Silâlı quvetleriniñ esas maqsadı – süratı «bir buçuq qat quvetleşken» Rusiye ordusınıñ ücümini toqtatmaqtır.
Rusiye prezidenti «Ukrayina barışıq planından ne içün vazgeçkenini şimdi añladı», dep ayttı. Onıñ fikirince, Ukrayina «ileride muzakere imkânlarını eyileştirmege tırışa».
«Amma barışıqsever insanlarğa, vatandaş infrastrukturasına darbe endirgen ya da özek energetika obyektleri içün telüke yaratmağa tırışqan insanlarnen angi muzakere ola bile», – dedi Putin.
Aynı vaqıtta, Deep State talil teşkilâtınıñ esaplarına köre, Ukrayina ordusı, Rusiye akimiyeti bildirgenine köre, 28 degil, Rusiyede 44 mesken yerni kontrol ete, daa 10-unıñ statusı belli degil. Teşkilât bu «bayağı qapalı» bir qıymet kesüv ola, dep qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.