Rusiyeniñ Ukrayinağa qarşı darbesi neticesinde 8 insan elâk oldı – Ukrayina akimiyeti

Energetika nazirligi bildirgenine köre, Rusiye ücümi müim energetika obyektlerine zarar ketirdi

Noyabrniñ 20-ne keçer gecesi Rusiye ordusı Kyiv ve doquz vilâyetke ücüm etti, dep haber etti baş nazir Serğiy Koretskıy.

"Raketalar paytahtnıñ kritik infrastrukturasına ücüm etti, nişanlar arasında köpürler de bar edi. Suv, ofis ve ticaret binaları zarar kördi. Kyivde ücüm neticesinde altı insan elâk oldı. Daa 15 kişi yaralandı", – dedi o.

Ükümet reisiniñ malümatına köre, umumen Ukrayinada sekiz kişi elâk oldı, 28 insan yaralandı.

Koretskıy hatırlatqanına köre, Harkivde acele yardım maşinası ücümge oğradı – dört insan yaralandı, MR korpusı zarar kördi.

"Kyiv, Mıkolayıv, Odesa ve Çerniğiv vilâketlerinde müessiseler, Dnipropetrovsk, Lviv, Vinnıtsâ, Sumı ve Çerniğiv vilâyetlerinde mesken evler zarar kördi. Energetika obyektlerine de ücüm yapıldı", – dedi o.

Kyiv şeer yolbaşçısı Vitaliy Klıçko haber etkenine köre, yedi yaralanğan kişi hastahanege alındı. Yaralanğanlarğa adise yerinde de yardım etile.

Energetika nazirligi bildirgenine köre, Rusiye ücümi müim energetika obyektlerine zarar ketirdi. Elektrik stantsiyaları, ast stantsiyaları ve elektrik dağıtuv noqtaları aqqında aytıla.

"Atom elektrik stantsiyaları generatsiya küçüni eksiltmege mecbur oldı. Normal işke ardı-sıra qaytılacaq, zarar körgen hatlar ğayrıdan tiklengen soñ", – dep bildirdi energetika naziriniñ birinci muavini Artem Nekrasov.

Nazirlik ücüm neticesinde Kyivde, Vinnıtsâ, Dnipropetrovsk, Donetsk, Zaporijjâ, Kirovoğrad, Odesa, Harkiv, Herson, Çerkası ve Çerniğiv vilâyetlerinde saba elektrika yoq edi, dep bildirdi. Bazı regionlarda elektrika qazadan sebep söndürile, çoqusı vilâyette saat-saat söndürüvler devam ete.